Zer da? Zertarako da?
Auto-ebaluazioak ikaslearen prozesua behatzen du: ikaslearen hizkuntza gaitasunak zein diren, zein gaitasun lortu nahi / behar dituen eta zein gaitasun lortu dituen. Auto-ebaluazioa egiten da ikas-prozesua ongi doala egiaztatzeko eta ikaslearen motibazioa suspertzeko (helburu zehatzak jarrita). Baita ikas-prozesuan aldaketak egiteko ere.

Noiz da?
Ikastaroan zehar egin behar da; hasieran, ikaslearen gaitasunak zein diren ikusteko, hutsuneak antzemateko; bitartean, mailari dagozkion gaitasunak behar bezala bereganatzen ari den ikusteko; eta bukaeran, zein gaitasun lortu dituen egiaztatzeko eta, behar bada, hurrengo mailara pasatzeko. Auto-ebaluazioa etengabeko prozesua da.

Nork egin behar du?
Ebaluazio jarraituan ikaslearen gaitasunak behatzen ditugu, ikasleak berak behatzen ditu, dena den, irakaslearen parte hartzea ere garrantzitsua da ikas-prozesuan ikaslearen autonomia indartzeko eta motibazioa suspertzeko; baita aholko profesionala eskaintzeko ere.. Beraz, ikasleak bere burua behatzera, aztertzera bultzatzen du ebaluazio honek.

Nolakoa da?
Ikasleak eta irakasleak badituzte maila bakoitzeko adierazleak (A1 maila , A2 maila, B1 maila, B2. maila eta C1. maila), bertan jasota daude maila bakoitzeko zein gaitasun izan behar dituen ikasleak. Beraz, irakasleak ikaslea behatuko du sistematikoki: idazlanak eta mintza saioak aztertuz, eskolako ariketak jasoz. Irakasleak egoki ikusten badu, proba objektiboagoak ezar ditzake: testak, azterketak…

Zertarako balio du?
Lau balio aurreikus ditzakegu:
a.- ikas-prozesua ongi ala gaizki doan egiaztatu, eta aldaketak egin ahal izatea.
b.- ikasleak bere ikas-prozesuaren berri zehatza izatea, ikas-prozesuaren jabe izatea, ikas-autonomia suspertu eta, horrela, hutsuneak antzeman, gaitasunak indartu, …
c.- ikastaroaren bukaeran ikaslearen maila zein den zehaztea, eta, behar izanez gero, hurrengo mailara pasatzea.
d.- helburu zehatzak errazago antzematea eta horiek lortuta ikasteko motibazioa suspertzea